ភ្នំពេញ៖ អនិកជនខ្មែរមានសញ្ជាតិបារាំង ដែលជាអតីតក្រុមទ្រទ្រង់អតីតបក្សសង្គ្រោះជាតិលោក ជា លីម៉េង មានវ័យ ៦៨ឆ្នាំបានសុំចូលរួមជីវភាពនយោបាយជាមួយគណបក្សប្រជាជនបន្ទាប់ពីមើលឃើញពីសន្ដិភាព និងការអភិវឌ្ឍនៅកម្ពុជា។

លោក ជា លីម៉េង បានថ្លែងក្នុងវីដេអូមួយដែលបានផ្សាយជាសាធារណៈលើ Channel Telegram របស់សម្ដេចតេជោកាលពីយប់ថ្ងៃទី១៨ ខែកក្កដា ឆ្នាំ២០២៣ បានលើកឡើងពីគុណសម្បត្តិរបស់គណបក្សប្រជាជនដែលបានរំដោះប្រទេសចេញពីសង្គ្រាម និងនាំមកនូវការអភិវឌ្ឍជូនជាតិមាតុភូមិ។

លោកបន្ថែមថា៖ «សូមសម្ដេចតេជោ មេត្តាអនុញ្ញាតឱ្យខ្ញុំបាទ បានចូលរួមជីវភាពនយោបាយជាមួយគណបក្សប្រជាជនកម្ពុជា ក្នុងជីវិតចុងក្រោយរបស់ខ្ញុំបាទ ដើម្បីបានចូលរួមចំណែកថែរក្សាសន្ដិភាពចូលរួមចំណែកអភិវឌ្ឍន៍ប្រទេសជាតិជាពិសេសបំពេញភារកិច្ចជូនសម្ដេចដោយស្មោះអស់ពីដួចចិត្តដោយសេចក្ដីអនុគ្រោះបំផុត»។ 

សម្ដេចតេជោ ហ៊ុន សែន បានស្វាគមន៍ការចូលរួមជីវភាពនយោបាយពីលោក ជា លីម៉េង និងបានថ្លែងអំណរគុណចំពោះការផ្ដល់ភាពយុត្តិធម៌ពីលោកមកកាន់កាន់ប្រជាជនផងដែរ។

សម្ដេចបានសរសេរនៅ Channel Telegram ផងដែរថា៖ «ក្នុងនាមគណបក្សប្រជាជនកម្ពុជាខ្ញុំសូមថ្លែងអំណរគុណចំពោះលោកជា លីម៉េង ដែលកំពុងរស់នៅប្រទេសបារាំងដែលបានផ្តល់យុត្តិធម៍និងសុំចូលរួមជីវភាពនយោបាយជាមួយគណបក្សប្រជាជនកម្ពុជានៅជិវិតចុងក្រោយរបស់ខ្លួនបន្ទាប់ពីបានគាំទ្រនិងឧបត្ថម្ភបក្សប្រឆាំងអស់មួយរយៈកន្លងមក»។

គណបក្សប្រជាជនត្រូវបានបង្កើតឡើងនៅថ្ងៃទី២៨ ខែមិថុនា ឆ្នាំ១៩៥១ ដើម្បីរំដោះជាតិចេញពីអាណានិគមនិយមបារាំង ក្នុងថ្ងៃទី៧ ខែមករា ឆ្នាំ១៩៧៩ គណបក្សនេះបានវាយផ្ដួលរំលំខ្មែរក្រហមចេញពីអំណាចនឹងបានដឹកនាំកម្ពុជារហូតបច្ចុប្បន្នយ៉ាងរឹងមាំ។

ប្រធានគណបក្សសម្ដេចតេជោ ហ៊ុន សែន ធ្លាប់បានប្រកាសជារឿយៗថាគណបក្សនៅតែស្វាគមន៍មនុស្សគ្រប់និន្នាការទាំងអស់ដើម្បីរួមកម្លាំងជាមួយគណបក្សក្នុងការអភិវឌ្ឍប្រទេសកម្ពុជាបន្តទៅមុខទៀត៕